Fertig.

Łod paru tydni pisołech ło łokolicach Katowic. Pisołech tak, co by istni kierzy nie majom ałta, tyż mogli zobejrzeć pikne rzeczy, jadunc banką, cugiem eli ałtobusym . Terozki musza Wom pedzieć, co żech nie urodził na Ślonsku. Pochodza z Krakowa, czyli cipia (chamia) sie i żech jest Gorol, a przecać na Ślonsku mieszkajom Hanysy.Ale wiela lot tu mieszkom i poznołech ta pikno ziemia. Polubiłech jom i tych kierzy tu mieszkajom.Pszaja im. Wiem tyż, że fulo się kupa roztomaitych gupot o Ślonsku.A jak to jest po prowdzie?

Po pirwsze.

Nie rubta mi terozki gańby, ino drab przyjeżdżejcie sam tukyj. Forsztelujecie se, co małowiela poła miasta to trowa i stromy? Co każdy konsek Ślonska to pikny łobrozek. Rzeki bezma wypucowane i żodne ciapry i inne flyje nimi nie płynum.

Po wtóre.

Bywało pirwy, że to czym my dychali to było genał widać. Jak se człek ubroł blank biało koszula, to chnet buła łona czorno jak wongiel, a kragla to nie szło ani w waszkuchnie na waszbrecie dopucować. Ale z tym już fertig. Kaj som te czasy, co żech wparzył na nie swojo cześnia, na kramf i ślozech blank uciorany w potarganych galotach, a doma jo jeszcze dostał szmary łod fatra. Ni wiem co bajtle terozki tyż tak rojbrują ( a co by nie?), ale som blank czyste i doma nie majom lejtów.

No i trzecie najzocniejsze

A kaj najdziecie takie gryfne frele i takich odpicowanych gryfcoków? Łod dawna się smykom po świecie. Ale wiem, że mom ptoka , co by ino wanderować po kraju naszych łóćców. Przyjeżdżejcie ku nom.Bedziecie nynać jak dziecka u nas na Mariackiej 13.Bedziecie szpacerować i grajfcyć na roztomaite pikne rzeczy.

Żegnom Wos gryfnie. Chowcie i patrzcie tam jako!

PS. Pewnikiem będziecie się dziwować jak Wom pokaża łobrozek, na kierym jest namalowany Górny Ślonzek:

Sztopło Wos? Ja?